Delicts succedids a l'exteriur

Vus abitais en Svizra ed essas victima d'in delict succedì a l'exteriur? È ina confamigliara u in confamigliar daventà victima d'in delict succedì a l'exteriur?

Titelbild - Delicts succedids a l'exteriur

Igl è pli simpel da far valair Voss dretgs suenter Voss return en Svizra, sche Vus pudais preschentar ils documents davart quai ch'è succedì ed avais inoltrà ina denunzia penala en il stadi, en il qual è succedì il delict. As laschai confermar ils fatgs d'ina media u d'in medi e/u da la polizia. Nudai precisamain ils nums da las persunas, cun las qualas Vus avais gì contact (medias e medis, commembers d'autoritads, etc.), sco er ils nums dals lieus e tegnai bain en salv questas indicaziuns.

A tgi pudais Vus As drizzar al lieu?

Vossa represchentanza consulara / ambassada po sustegnair Vus. Burgaisas svizras e burgais svizzers e lur confamigliars pon contactar l'entir onn la helpline dal Departament federal d'affars exteriurs (24h, 365 dis l'onn).

Adressas nizzaivlas davart las pussaivladads da sustegn al lieu chattais Vus sin la pagina-web da victim support europe

A tgi pudais Vus As drizzar suenter Voss return en Svizra?

En mintga chantun svizzer datti posts da cussegliaziun. Ils posts da cussegliaziun As pon sustegnair e cussegliar en dumondas da l'agid a victimas. N'hajas betg retegnientschas da contactar il post da cussegliaziun, era sche Vus n'essas betg segira/segir, sche Vus essas en il dretg lieu. Il post da cussegliaziun As infurmescha en mintga cas, nua che Vus pudais survegnir agid.

Las adressas dals posts da cussegliaziun da l'agid a victimas en Svizra chattais Vus qua

Tge dretgs avais Vus?

En Svizra avais Vus il dretg a cussegliaziun ed agid d'in post da cussegliaziun. L'agid è gratuit. Sut tschertas circumstanzas pudais Vus era survegnir in agid a pli lunga vista.

Per che Vus hajas il dretg da survegnir agid en Svizra, stuais Vus avair Voss domicil en Svizra (il mument dal delict e da l'inoltraziun da la dumonda). Sche Vus essas in confamigliar da la victima, sto la victima medemamain esser domiciliada en Svizra.

As infurmai davart las pussaivladads da survegnir sustegn u in'indemnisaziun dal stadi, en il qual il delict è succedì

per ils stadis commembers da l'UE

per il stadis che han ratifitgà la Convenziun europeica davart l'indemnisaziun da victimas da delicts da violenza

Dapli infurmaziuns

Uffizi federal da giustia: Informationsbroschüre «Opferhilfe bei Straftaten im Ausland»