Mesiras repressivas per motivs da provediment
Vus essas daventà la victima d’ina mesira repressiva per motivs da provediment avant il 1981? U essas Vus vegnì nizzegià ora u maltractà sco uffant plazzà? Voss post da cussegliaziun chantunal è qua per Vus, sche Vus vulais raquintar da Vossas experientschas engrevgiantas. Ed el sustegna Vus da dumandar per ina contribuziun da solidaritad.
![Titelbild - Mesiras repressivas per motivs da provediment](https://ch-sodk.s3.eu-west-1.amazonaws.com/media/_s/djangocms_header/image/Opferhilfe_alter_Mann-17adb0f880238b52.jpg)
Vus essas la victima d’ina mesira repressiva per motivs da provediment u d’in plazzament extrafamigliar, sche Vus essas per exempel:
- vegnì „plazzà administrativamain“ senza sentenzia giudiziala.
- vegnì nizzegià ora u maltractà sco uffant plazzà.
- vegnì maltractà sco uffant en ina chasa d’uffants.
- vegnì mess sut pressiun da dar davent Voss uffant u d’al dar liber per l’adopziun.
- vegnì sterilisà u sfurzà da stgatschar in uffant cunter Vossa voluntad u senza savair.
En tut quests cas avais Vus il dretg da survegnir sustegn da l’Agid a victimas sco er il dretg sin ina contribuziun da solidaritad. La premissa per obtegnair ina tala contribuziun da solidaritad è che la mesira repressiva per motivs da provediment u il plazzament extrafamigliar saja vegnì ordinà avant il 1981. Cun dar ina contribuziun da solidaritad renconuscha la societad ch’igl è vegnì fatg entiert a Vus.
Vulais Vus raquintar Vossa istorgia ad insatgi? U vulais Vus far ina dumonda per ina contribuziun da solidaritad e duvrais sustegn? Lura essas Vus en il dretg lieu tar Voss post da cussegliaziun chantunal – per ordinari è quai l’Agid a victimas en Voss chantun.
La cussegliaziun è gratuita e confidenziala: nagin n’intervegn insatge da Vossa istorgia, sche Vus na vulais betg quai. Tut ils collavuraturs da l’Agid a victimas èn persunas spezialisadas.
Tge pon ils posts da cussegliaziun far per Vus?
Las persunas spezialisadas dals posts da cussegliaziun pon per exempel far il suandant per Vus:
- Ellas taidlan tiers, sche Vus vulais raquintar da Vossas experientschas engrevgiantas.
- Ellas sustegnan Vus, sche Vus avais dumondas davart l’ulteriur proceder.
- Ellas accumpognan Vus da tschertgar Voss dossiers.
- Ellas gidan Vus a far ina dumonda per ina contribuziun da solidaritad.
- Ils posts da cussegliaziun As intermedieschan en cas da basegn contacts cun ulteriurs servetschs (p.ex. autoritads u archivs).
Colliaziuns
Uffizi federal da giustia > Contribuziun da solidaritad
Uffizi federal da giustia > Victimas da mesiras repressivas per motivs da provediment